ដោយសារតែបញ្ហានៅក្នុងការផលិតបន្ទះឈីប Exynos 2500 ពេលនេះក្រុមហ៊ុន Samsung អាចនឹងបង្ខំមកប្រើ Snapdragon 8 8Elite ទាំងស្រុងវិញសម្រាប់ទូរស័ព្ទស៊េរី Galaxy S25 ។
Samsungមានគំម្រោងបំពាក់នូវបន្ទះឈីប Exynos 2500 ដែលជាបន្ទះឈីបថ្មីដែលត្រូវបានគេគិតថានឹងបំពាក់នៅលើ Galaxy S25 ។ តែទោះជាយ៉ាងណាក៏ដោយ ឥឡូវនេះក្រុមហ៊ុន Samsung ហាក់ដូចជា អាចនឹងត្រូវបង្ខំចិត្តពិនិត្យឡើងវិញនូវផែនការរបស់ខ្លួន។ យោងតាមរបាយការណ៍ថ្មីៗនេះ ពីគេហទំព័រ Business Korea របស់ កូរ៉េខាងត្បូង ក្រុមហ៊ុន Samsung កំពុងជួបប្រទះបញ្ហាធ្ងន់ធ្ងរនៅក្នុងការផលិត processor ថ្មីនេះ។
ដោយសារការផលិតបន្ទះឈីបនេះមានបញ្ហា Samsung កំពុងពិចារណាមិនប្រើប្រាស់បន្ទះឈីបថ្មីនេះឡើយសម្រាប់ស៊េរី Galaxy S25 ដែលអាចនឹងមានម៉ូដែលផ្សេងទៀតដែរដូចជា S25 , S25 +, និង S25 Ultra ។ ប្រសិនបើរឿងនេះកើតឡើងមែន ទូរស័ព្ទទាំងអស់នៅក្នុងស៊េរីកំពូលរបស់ Samsung នឹងត្រូវបំពាក់ដោយ Snapdragon 8Elite របស់ ក្រុមហ៊ុន Qualcomm ទាំងអស់ ដែលវាអាចជាការប៉ះទង្គិចដ៏ធំមួយសម្រាប់ Samsung ផងដែរ។
ទោះយ៉ាង ក្រុមហ៊ុន Samsung ក៏បានវិនិយោគដ៏ធំនៅក្នុង វិស័យផលិតបន្ទះឈីបដើម្បីដើរតាមឲ្យទាន់ TSMC ដែលជាក្រុមហ៊ុនផលិតកំពូលរបស់ឧស្សាហកម្មនេះ។ ក្នុងរយៈពេលប៉ុន្មានខែថ្មីៗនេះ គម្លាតរវាងក្រុមហ៊ុនទាំងពីរបានពង្រីកបន្ថែមទៀត ឥឡូវនេះ TSMC បានកាន់កាប់ 62.3% នៃទីផ្សារ ខណៈដែលចំណែករបស់ក្រុមហ៊ុន Samsung បានធ្លាក់ចុះសល់ត្រឹមជាង 11% ប៉ុណ្ណោះ ។ ក្នុងរយៈពេលប៉ុន្មានឆ្នាំចុងក្រោយនេះផងដែរ Samsung ក៏បានបាត់បង់អតិថិជនធំៗរបស់ខ្លួន ដោយក្រុមហ៊ុនដូចជា Qualcomm និង NVIDIA បានសម្រេចចិត្តពឹងផ្អែកលើ TSMC សម្រាប់ការផលិតបន្ទះឈីបរបស់ពួកគេ ដោយបោះបង់ចោលក្រុមហ៊ុន Samsung ។
គួរឲ្យដឹងដែរថាក្រុមហ៊ុនSamsungក៏ជាក្រុមហ៊ុនមួយដែលផលិតបន្ទះឈីបខ្លួនឯង ហើយសម្រាប់ដំណើរការបន្ទះឈីបថ្មីរបស់ខ្លួនអាចនឹងដាក់នៅ Galaxy S25 តែប្រហែលជាមិនអាចដាក់បានវិញទើបក្រុមហ៊ុនងាកទៅរកក្រុមហ៊ុន Qualcomm ។
ប្រភព : ceotech