យោងតាមពាក្យចចាមអារ៉ាមដែលបានរាយការណ៍ថា Apple កំពុងអភិវឌ្ឍ អេក្រង់ 90Hz ដែលអាចបំពាក់នៅលើ iPad Air , 24-inch iMac និង Studio Display ។
បច្ចុប្បន្ននេះ iPad Air, iMac 24-inch និង Studio Display សុទ្ធតែមាន អេក្រង់ Refresh Rate 60Hz ។ ហើយ Apple កំពុងធ្វើកំណែទម្រង់របស់ខ្លួនដោយកែពី 60Hz ទៅ 90 Hz ទៅលើឧបករណ៍មួយចំនួនដែលខ្លួននឹងត្រូវបំពាក់ ដើម្បីធ្វើឲ្យអេក្រង់មានដំណើរការបានរលូនដើម្បីឲ្យអ្នកប្រើប្រាស់កាន់តែទទួលបាននូវបទពិសោធន៍មួយដ៏ប្រសើរ។
យោងតាមការលេចធ្លាយ អេក្រង់ថ្មីនេះអាចបង្ហាញខ្លួនជាលើកដំបូងនៅលើ iPad Air M3 បន្ទាប់មកគឺ iMac និង Studio Display ជំនាន់ក្រោយ។ Apple កំពុងធ្វើការលើការកែលម្អគុណភាពអេក្រង់សម្រាប់ iPad Air M3 នាពេលខាងមុខដោយបង្ហាញអេក្រង់ LCD 90Hz ដែលវានឹងដំណើរការបានល្អជាងអេក្រង់ 60Hz បច្ចុប្បន្ន ។
ការកែលម្អនេះនឹងធ្វើឱ្យ ការគូរ និងការលេងហ្គេម និងកិច្ចការផ្សេងទៀតមានការឆ្លើយតបមកវិញបានលឿន។ Apple ក៏គ្រោងនឹងនាំយកបច្ចេកវិទ្យាអេក្រង់ 90Hz នេះទៅកាន់ផលិតផលផ្សេងទៀតដូចជា iMac 24-inch និង Studio Display ។
យោងតាមសារព័ត៌មាន Bloomberg រាយការណ៍ថា iPad Air ថ្មីត្រូវបានគេរំពឹងថានឹងចេញនៅដើមឆ្នាំ 2025។ ប្រសិនបើ Apple ណែនាំអេក្រង់ 90Hz នៅលើឧបករណ៍ទាំងនេះ វានឹងបង្កើនថាមពលក៏ដូចជាធ្វើឲ្យប្រសើរឡើង ហើយក៏ជាការរំពឹងទុករបស់អ្នកប្រើប្រាស់សម្រាប់ដំណើរការដ៏រលូន។
មិនតែប៉ុណ្ណោះគេក៏រំពឹងទៀតថា Apple អាចនឹងផ្តល់នូវអេក្រង់មួយនេះ ទៅកាន់តែច្រើននៅលើឧបករណ៍ផ្សេងៗរបស់ខ្លួន ដែលធ្វើឱ្យផលិតផលខ្លួនមានភាពដូចគ្នា និងស្របតាមតម្រូវការរបស់អ្នកប្រើប្រាស់តែម្តង។
ប្រភព : ceotech