ពិធីសម្ពោធដាក់ឲ្យប្រើប្រាស់ Alipay+ scan KHQR ។ នេះជាកិច្ចសហប្រតិបត្តិការរវាង Ant International និង ធនាគារជាតិនៃកម្ពុជា ដែលនឹងអនុញ្ញាតឲ្យអតិថិជន របស់ Alipay+ មកពី ៩ ប្រទេស មក scan KHQR នៅកម្ពុជា។ កិច្ចសហប្រតិបត្តិការនេះនឹងជួយសម្រួល ភ្ញៀវទេសចរណ៍ និងការលក់រាយ នៅកម្ពុជាឲ្យកាន់តែងាយស្រួល។
ចំពោះដំណាក់កាលបន្ទាប់ អ្នកប្រើប្រាស់ app Bakong នឹងអាច scan Alipay នៅប្រទេស ចិន និង Alipay+ នៅប្រទេសដ៏ទៃ ដោយងាយស្រួល។ សូមបញ្ជាក់ថា ការប្រើប្រាស់នេះគឺសម្រាប់តែ គណនីប្រាក់រៀលតែប៉ុណ្ណោះ។ ដូច្នេះខ្ញុំសូមលើកទឹកចិត្តឲ្យអ្នកលក់ទាំងអស់មាន KHQR និងគណនីប្រាក់រៀលដើម្បីទទួលបានផលប្រយោជន៍ទាំងនេះ។
លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអញ្ជើញជាអធិបតីក្នុងពិធីដាក់ឱ្យដំណើរការប្រតិបត្តិការទូទាត់ឆ្លងដែនតាមឃ្យូអរកូត (QR Code) រវាងធនាគារជាតិនៃកម្ពុជា និងក្រុមហ៊ុន Alipay+ Connect Pte. Ltd. នាព្រឹកថ្ងៃទី១៤ ខែតុលា ឆ្នាំ២០២៤ នៅរាជធានីភ្នំពេញ ព្រះរាជាណាចក្រកម្ពុជា។
ពិធីដ៏មានអត្ថន័យនេះបានប្រព្រឹត្តិទៅដោយមានវត្តមានចូលរួមរបស់លោក Edward Yue អ្នកគ្រប់គ្រងទូទៅទទួលបន្ទុកតំបន់អាស៊ីអាគ្នេយ៍ អូស្ត្រាលី និងនូវែលសេឡង់ នៃក្រុមហ៊ុន Ant International ព្រមទាំងតំណាងគ្រឹះស្ថានធនាគារនិងហិរញ្ញវត្ថុផងដែរ។ តាមរយៈក្របខ័ណ្ឌនៃកិច្ចសហប្រតិបត្តិការនេះ អ្នកប្រើប្រាស់បណ្តាញ Alipay+ អាចស្កេនខេអេចឃ្យូអរកូត (KHQR Code) ដើម្បីទូទាត់ថ្លៃទំនិញ និងសេវារបស់អាជីវករនៅប្រទេសកម្ពុជា ដែលមានគណនីជាប្រាក់រៀល។
ប្រភព : ធនាគារជាតិនៃកម្ពុជា