លោក ដូណាល់ ត្រាំ ប្រធានាធិបតីសហរដ្ឋអាមេរិក បានធ្វើការគំរាមកំហែងយ៉ាងធ្ងន់ធ្ងរទៅលើក្រុមហ៊ុនផលិតសៀគ្វីបន្ទះឈីប TSMC ដែលមានមូលដ្ឋាននៅតៃវ៉ាន់ ដោយប្រកាសថានឹងដាក់ពន្ធពាណិជ្ជកម្មខ្ពស់រហូតដល់ ១០០% លើផលិតផលរបស់ក្រុមហ៊ុននេះប្រសិនបើពួកគេបដិសេធមិនពង្រីកការវិនិយោគសាងសង់រោងចក្រថ្មីនៅសហរដ្ឋអាមេរិកដើម្បីធានាសន្តិសុខជាតិរបស់អាមេរិកក្នុងវិស័យបច្ចេកវិទ្យាកម្រិតខ្ពស់ដែលជាផ្នែកសំខាន់នៃយុទ្ធសាស្ត្រប្រឆាំងចិនរបស់អាមេរិក។
លោក Trump ក៏បានរិះគន់អំពីការគាំទ្ររបស់រដ្ឋាភិបាលទៅដល់ក្រុមហ៊ុនឈីបបរទេស ដែលកាលពីមុន រដ្ឋាភិបាលអាមេរិកផ្តល់ជំនួយហិរញ្ញវត្ថុដល់ TSMC ប៉ុន្តែលោក ត្រាំ និយាយថាលោកមិនចូលចិត្តផ្តល់ជំនួយទេ គឺចូលចិត្តប្រើពន្ធដើម្បីជំរុញឱ្យក្រុមហ៊ុនមកវិនិយោគនៅអាមេរិក។
ជាការឆ្លើយតប រដ្ឋាភិបាលតៃវ៉ាន់បានចាប់ផ្តើមដំណើរការពិភាក្សាយុទ្ធសាស្ត្រជាមួយអាមេរិកដើម្បីដោះស្រាយវិបត្តិនេះដោយផ្តល់ការលើកទឹកចិត្តផ្សេងៗដូចជាការអនុគ្រោះពន្ធពិសេស ការធានាឱកាសវិនិយោគបន្ថែម និងការគាំទ្រផ្នែកហិរញ្ញវត្ថុដើម្បីកាត់បន្ថយភាពតានតឹងនៃស្ថានភាពដែលកំពុងកើតឡើងនេះ។
ស្ថានភាពនេះបានធ្វើឱ្យទីផ្សារភាគហ៊ុនតៃវ៉ាន់មានការរញ្ជួយយ៉ាងខ្លាំងដែលធ្វើឱ្យរដ្ឋាភិបាលតៃវ៉ាន់ត្រូវចំណាយមូលនិធិស្ថិរភាពយ៉ាងច្រើនរហូតដល់ ១៥ ពាន់លានដុល្លារដើម្បីស្តារទំនុកចិត្តរបស់វិនិយោគិនឡើងវិញ តែទោះបីជាភាគហ៊ុនរបស់ TSMC នៅមានស្ថេរភាពក៏ដោយ ក៏ក្រុមហ៊ុនផ្គត់ផ្គង់សំខាន់ៗដូចជា Foxconn បានជួបការធ្លាក់ចុះយ៉ាងខ្លាំងនៅក្នុងតម្លៃភាគហ៊ុនដែលបង្ហាញពីឥទ្ធិពលយ៉ាងធ្ងន់ធ្ងរនៃវិបត្តិនេះលើសេដ្ឋកិច្ចតៃវ៉ាន់ទាំងមូល។
ប្រភព : gizmochina