បងប្អូនមានធ្ងល់ទេ ក្រុមហ៊ុន Apple ដែលមានមូលដ្ឋាននៅសហរដ្ឋអាមេរិក បែរជាមិនផលិតផលិតផលរបស់ខ្លួននៅក្នុងស្រុកទៅវិញ? យើងដឹងហើយថា Apple មានមូលដ្ឋាននៅសហរដ្ឋអាមេរិក ប៉ុន្តែពួកគេតែងតែពឹងផ្អែកលើខ្សែសង្វាក់ផ្គត់ផ្គង់នៅតំបន់អាស៊ីដូចជា ចិន វៀតណាម និងឥណ្ឌា ជាដើម ដែលអាចផ្តល់អត្ថប្រយោជន៍មកក្រុមហ៊ុនច្រើនជាងក្នុងការផលិតទំនិញរាប់លានគ្រឿងបានយ៉ាងងាយស្រួល និងថោកជាង បើប្រៀបធៀបនឹងការផលិតនៅសហរដ្ឋអាមេរិក។
ចុះបើសួរថា Apple មានគម្រោងផលិត iPhone នៅសហរដ្ឋអាមេរិកឬទេ?
អ្នកវិភាគ Mark Gurman ពី Bloomberg ក៏បានបញ្ជាក់ថា Apple មិនមានផែនការផលិត iPhone នៅសហរដ្ឋអាមេរិកទេ ដោយសារកត្តាតម្លៃប្រតិបត្តិការខ្ពស់លើសលប់ រួមទាំងការគ្រប់គ្រងខ្សែសង្វាក់ផ្គត់ផ្គង់ដ៏ស្មុគស្មាញ ទោះបីជាក្រុមហ៊ុនបានវិនិយោគយ៉ាងច្រើនក៏ដោយ។
Vadim Yuryev អ្នកវិភាគផ្នែកបច្ចេកវិទ្យាបានលើកឡើងអំពីកត្តាកម្មករអាមេរិកផងដែរ គឺមិនដូចជាកម្មករ នៅអាស៊ីនោះទេ បើផលិតនៅអាមេរិក នឹងធ្វើឱ្យថ្លៃដើមផលិតកម្មកើនខ្ពស់ ហើយប៉ះពាល់ដល់តម្លៃលក់ចុងក្រោយ។
ឧទាហរណ៍ជាក់ស្តែង ក្រុមហ៊ុន Foxconn ដៃគូរផលិតកម្មរបស់ Apple អាចជួលកម្មករបានរាប់ម៉ឺននាក់យ៉ាងរហ័ស ហើយផ្តល់ប្រាក់រង្វាន់ចុះហត្ថលេខាត្រឹមតែ ១០៥០ ដុល្លារប៉ុណ្ណោះ រីឯនៅសហរដ្ឋអាមេរិក ចំនួនទឹកប្រាក់នេះពិតជាមិនគ្រប់គ្រាន់ដើម្បីទាក់ទាញកម្មករច្រើននោះទេ ដូច្នេះការផលិត iPhone នៅសហរដ្ឋអាមេរិកនៅតែជារឿងគ្មានលទ្ធភាពសម្រាប់អនាគតខាងមុខ។
ប្រភព : ceotech