យោងតាមព័ត៌មានចចាមអារ៉ាមថ្មីៗ ស្មាតហ្វូនបត់បីដងថ្មីរបស់ Samsung ដែលអាចមានឈ្មោះថា Galaxy G Fold នឹងមានល្បឿនសាកថ្មត្រឹមតែ 25W ប៉ុណ្ណោះ ការសម្រេចចិត្តនេះហាក់បីដូចជាមិនស្របជាមួយនឹងទំនោរទីផ្សារបច្ចុប្បន្នដែលកំពុងប្រកួតប្រជែងលើល្បឿនសាកលឿនដល់ 100W ឬច្រើនជាងនេះ តែ Samsung ហាក់ដូចជាមានហេតុផលជាក់លាក់សម្រាប់ការជ្រើសរើសនេះ។
ដោយសារភាពស្មុគស្មាញនៃការរចនាឧបករណ៍បត់បីដងអាចបង្កើនបញ្ហាកំដៅ ដែលអាចប៉ះពាល់ដល់សុវត្ថិភាព និងអាយុកាលថ្ម ក្រុមហ៊ុនប្រហែលជាចង់ផ្តោតលើភាពជឿជាក់ និងសុវត្ថិភាពជាជាងការប្រកួតលើល្បឿនសាកថ្ម ជាពិសេសសម្រាប់ឧបករណ៍ដែលមានរចនាសម្ព័ន្ធស្មុគស្មាញ និងមានតម្លៃថ្លៃដូចស្មាតហ្វូនបត់បីដងនេះ ទោះជាយ៉ាងណាក៏ដោយ អ្នកប្រើប្រាស់អាចនឹងត្រូវរង់ចាំពេលសាកថ្មយូរជាងធម្មតា ដោយសារល្បឿនសាក 25W ដែលយឺតជាងម៉ូដែល Galaxy S ដែលអាចសាកបានល្បឿនខ្ពស់ដល់ 45W ហើយទាបជាងស្តង់ដារឧបករណ៍ប្រកួតប្រជែងផ្សេងៗទៀត។
យើងនៅតែត្រូវរង់ចាំការបញ្ជាក់ផ្លូវការពី Samsung ដើម្បីដឹងពីលក្ខណៈបច្ចេកទេសចុងក្រោយនៃឧបករណ៍នេះ និងហេតុផលពិតប្រាកដរបស់ពួកគេក្នុងការជ្រើសរើសល្បឿនសាកទាបបែបនេះសម្រាប់ឧបករណ៍ដែលអាចនឹងក្លាយជាផលិតផលឈានមុខគេនៅលើទីផ្សារ។
ប្រភព : ceotech