ក្រុមហ៊ុន Nubia បានណែនាំ Nubia Z70 Ultra កាលពីខែវិច្ឆិកាកន្លងទៅ ដែលដំណើរការដោយ Snapdragon 8 Elite អេក្រង់ 1.5K និងថ្មដែលរចនាសម្រាប់ថាមពលប្រើប្រាស់យូរ ឥឡូវនេះម៉ាកនេះបានបញ្ជាក់ថានឹងចេញ Nubia Z70S Ultra Photographer Edition ដែលផ្តោតលើសមត្ថភាពថតរូប ដោយនឹងបង្ហាញជាសាធារណៈនៅថ្ងៃទី២៨ ខែមេសា ខាងមុខនេះ។
Nubia Z70S Ultra Photographer Edition មានការរចនាដ៏ស្រស់ស្អាត និងប្លែក ជាមួយនឹងការរចនាខាងក្រោយពីស្បែកដែលមើលទៅមានភាពប្រណីតទាក់ទាញ រួមនឹងកាមេរ៉ាដែលមានរង្វង់ពណ៌ក្រហមឆើតឆាយ និងស្លាក Neovision ដែលបញ្ជាក់ពីសមត្ថភាពថតរូបខ្ពស់។
ម៉ូដែលនេះបែងចែកកាមេរ៉ាជាពីរផ្នែក ផ្នែកខាងលើមានទំហំ 35mm ខណៈផ្នែកខាងក្រោមមានកាមេរ៉ា periscope និង ultra-wide ដែល Nubia អះអាងថាការរចនានេះមិនត្រឹមតែបង្កើនតុល្យភាពសោភ័ណភាពប៉ុណ្ណោះទេ ថែមទាំងធ្វើឱ្យងាយស្គាល់ផងដែរ ម៉ូដែលនេះនឹងមានពីរពណ៌សម្រាប់ការជ្រើសរើសគឺពណ៌ខ្មៅ និងពណ៌ទឹកក្រូច។
កាមេរ៉ាចម្បងទំហំ 35mm របស់ Nubia Z70S Ultra Photographer Edition ត្រូវបានរចនាឡើងដើម្បីប្រកួតប្រជែងជាមួយឧបករណ៍ដែលមានកាមេរ៉ាទំហំ 1 អ៊ីញនៅលើស្មាតហ្វូនថ្នាក់ខ្ពស់ផ្សេងៗ ដោយផ្តោតលើសមត្ថភាពចាប់ពន្លឺ និងផលិតរូបភាពគុណភាពខ្ពស់។
លក្ខណៈពិសេសមួយទៀតគឺអេក្រង់ AMOLED ពេញអេក្រង់ដែលមានកម្រិតភាពច្បាស់ 1.5K រួមជាមួយកាមេរ៉ាខាងមុខដែលរួមបញ្ចូលគ្នានៅក្រោមអេក្រង់ ចុងក្រោយ ម៉ូដែលនេះនឹងប្រើបន្ទះឈីប Snapdragon 8 Elite ដើម្បីធានាដំណើរការដ៏រលូនតែម្តង។
ប្រភព : ceotech