គួរដឹងហើយថាក្រុមហ៊ុនដ៏ធំក្នុងប្រទេសចិនមួយនេះគឺទទួលបានការពេញនិយមយ៉ាងខ្លាំង ហើយកម្មវិធីនេះក៏មានវត្តមានក្នុងប្រទេសមហាអំណាចដូចជាសហរដ្ឋអាមេរិកផងដែរ។ ចុះហេតុអ្វីបានជាតុលាការមិនចង់ឲ្យTiktokមាននៅក្នុងសហរដ្ឋអាមេរិកតទៅទៀត?
កាលពីពេលថ្មីៗនេះតុលាការសហរដ្ឋអាមេរិកសម្រេចថា ក្រុមហ៊ុនចិនByteDance ដែលជាម្ចាស់ TikTok ត្រូវតែលក់ប្រតិបត្តិការ TikTok ឬភាគហ៊ុននេះ ទៅឲ្យក្រុមហ៊ុន ឬអង្គភាពមួយផ្សេងទៀតនៅក្នុងសហរដ្ឋអាមេរិក នៅដើមឆ្នាំក្រោយ ប្រសិនបើវាមិនដូច្នោះទេ TikTok អាចត្រូវបានហាមឃាត់លែងឲ្យមានការប្រើប្រាស់នៅក្នុងសហរដ្ឋអាមេរិកបន្តទៀតនោះទេ។
កត្តាដែលអាមេរិកធ្វើបែបនេះក៏ព្រោះតែការព្រួយបារម្ភពីសមាជិកសភាអាមេរិកអំពីសក្តានុពលរបស់ TikTok ក្នុងការចែករំលែកទិន្នន័យអ្នកប្រើប្រាស់អាមេរិកជាមួយរដ្ឋាភិបាលចិន ដែលបង្កហានិភ័យដល់សន្តិសុខជាតិ និងឯកជនភាព។ ក្រសួងយុត្តិធម៌អាមេរិកជឿជាក់ថា TikTok ដែលជាកម្មសិទ្ធិរបស់ក្រុមហ៊ុនចិន អាចបង្កគ្រោះថ្នាក់ ដោយសារវាមានសិទ្ធិចូលប្រើព័ត៌មានផ្ទាល់ខ្លួនជាច្រើនអំពីអ្នកប្រើប្រាស់ជនជាតិអាមេរិកផ្ទាល់ជាង 170 លាននាក់ដែលបានប្រើប្រាស់។
តែទោះយ៉ាងណាមិញនាយកប្រតិបត្តិ TikTok លោក Shou Zi Chew បានសម្តែងការខកចិត្តយ៉ាងខ្លាំងចំពោះសេចក្តីសម្រេចនេះ ប៉ុន្តែលោកបានប្តេជ្ញាបន្តតស៊ូក្នុងងការដោះស្រាយរឿងទាំងនេះ។ ដើម្បីសេរីភាពបញ្ចេញមតិហើយមតិមួយចំនួនក៏បានធ្វើការរិះគន់ទៅលើតុលាការសហរដ្ឋអាមេរិកផងដែរក្នុងការហាមឃាត់ TikTok នេះ។ ក្នុងរឿងដែលកំពុងក្តៅនេះយើងរង់ចាំមើលថាតើក្រុមហ៊ុនTikTokមានដំណោះស្រាយបែបណាជុំវិញបញ្ហាដែលបានកើតឡើងនេះ។
ប្រភព : reuters