Snap ដែលជាក្រុមហ៊ុននៅពីក្រោយ Snapchat កំពុងដាក់បង្ហាញមុខងារឆ្លាតវៃសិប្បនិម្មិតថ្មី (AI) ដែលអាចបង្កើតរូបភាពពីការពិពណ៌នាអត្ថបទបានលឿនក្នុងរយៈពេលតិចជាងពីរវិនាទីប៉ុណ្ណោះ។ អ្វីដែលពិសេសនោះគឺថា AI នេះនឹងដំណើរការដោយផ្ទាល់នៅលើទូរសព្ទរបស់អ្នក ដោយមិនចាំបាច់ភ្ជាប់អ៊ីនធឺណិត ឬម៉ាស៊ីនមេខាងក្រៅ មិនដូចបច្ចេកវិទ្យា AI ស្រដៀងគ្នាផ្សេងទៀតពីក្រុមហ៊ុនដូចជា Google, OpenAI និង DeepSeek នោះទេ។ ការរីកចម្រើននេះត្រូវបានគេរំពឹងថានឹងធ្វើឱ្យកម្មវិធី Snapchat កាន់តែមានឥទ្ធិពល នឹងធ្វើឲ្យអ្នកប្រើប្រាស់កាន់តែចង់ប្រើ។
ប្រព័ន្ធ AI ថ្មីរបស់ Snap អាចបង្កើតរូបភាពគុណភាពខ្ពស់ក្នុងរយៈពេលដ៏ខ្លីបំផុត។ ឧទាហរណ៍នៅលើ iPhone 16 Pro Max វាចំណាយពេលត្រឹមតែ 1.4 វិនាទីប៉ុណ្ណោះដោយមិនត្រូវការអ៊ីនធឺណិតនោះទេ។
ប៉ុន្តែយ៉ាងណាក៏ដោយ Snap មិនទាន់បង្ហាញពីឧទាហរណ៍ជាក់ស្តែងណាមួយនៃរូបភាពដែលបង្កើតឡើងដោយបច្ចេកវិទ្យា AI ថ្មីរបស់ពួកគេជាផ្លូវការនៅឡើយទេ ប៉ុន្តែពួកគេធានាថាលទ្ធផលនឹងធ្វើឲ្យមានការចាប់អារម្មណ៍យ៉ាងខ្លាំង។ ឆាប់ៗនេះ អ្នកប្រើប្រាស់នឹងអាចទទួលបានបទពិសោធន៍ប្រើប្រាស់មុខងារដូចជា AI Snaps និង AI Bitmoji Backgrounds ជាមួយនឹងគម្រោងមុខងារជាច្រើនទៀត។
Snap មានគោលដៅច្បាស់លាស់ ដើម្បីផ្តល់នូវឧបករណ៍ AI កាន់តែទំនើប និងអាចចូលប្រើបាន។ ក្រុមហ៊ុនក៏មានគោលបំណងកាត់បន្ថយចំណាយប្រតិបត្តិការទាក់ទងនឹងដំណោះស្រាយ AI ទាំងនេះផងដែរ។ រហូតមកដល់ពេលនេះ Snap បានពឹងផ្អែកលើម៉ូដែល AI ពី Google និង OpenAI សម្រាប់មុខងាររបស់ Snapchat ។ ទោះជាយ៉ាងណាក៏ដោយជាមួយនឹងការណែនាំនៃម៉ូដែលថ្មីរបស់ពួកគេ Snap បានត្រៀមខ្លួនរួចជាស្រេចសម្រាប់ការផ្លាស់ប្តូរដ៏សំខាន់មួយនេះ។ ទិសដៅថ្មីនេះបង្ហាញពីការផ្លាស់ប្តូរដ៏សំខាន់ និងឆ្លុះបញ្ចាំងពីការវិវត្តន៍យ៉ាងឆាប់រហ័សនៃបច្ចេកវិទ្យា AI នៅក្នុងឧស្សាហកម្មទូរស័ព្ទ។
ប្រភព : ceotech