ក្រោយពី Samsung បានដាក់លក់ Galaxy S25 Ultra នៅក្នុងទីផ្សារជាច្រើន រួមទាំងប្រទេសចិនផងដែរ។ ពេលនេះក៏មានទូរស័ព្ទម៉ាក Ultra មួយចំនួនពីក្រុមហ៊ុនប្រកួតប្រជែងផ្សេងទៀតក៏នឹងត្រៀមបង្ហាញខ្លួនផងដែរ។ Xiaomi 15 Ultra ត្រូវបានគេរំពឹងថានឹងបង្ហាញខ្លួននៅចុងខែនេះ ចំណែក Find X8 Ultra របស់ Oppo អាចនឹងបង្ហាញខ្លួននៅក្នុងខែមីនា។
Vivo X200 Ultra និង X200S ត្រូវបានគេរំពឹងថានឹងចេញលក់នៅចុងខែមេសា នៅប្រទេសចិន។ ការលេចធ្លាយថ្មីបង្ហាញថា Vivo X200 Ultra នឹងមិនប្រើកាមេរ៉ាចម្បងទំហំ 1 អ៊ីញដូចជំនាន់មុនទេ ប៉ុន្តែអាចបំពាក់កាមេរ៉ា 50MP ទំហំ 1/1.28 អ៊ីញ ដែលគាំទ្រការពង្រីក 1.5x។
ប្រសិនបើ Vivo អាចជោគជ័យក្នុងការប្រើកាមេរ៉ាមេ 35mm និង ultra-wide sensor ធំលើស្មាតហ្វូនរបស់ខ្លួន ហើយទទួលបានផលវិជ្ជមាន ពួកគេអាចនឹងត្រូវដាក់បន្ថែមលើម៉ូដែល Pro នៅពេលខាងមុខ។ ការដាក់បញ្ចូលបច្ចេកវិទ្យានេះអាចក្លាយជានិន្នាការថ្មីក្នុងឧស្សាហកម្ម ហើយអាចជំរុញឱ្យក្រុមហ៊ុនផ្សេងៗអនុវត្តបច្ចេកវិទ្យាកាមេរ៉ាទាំងនេះដូចគ្នា។
Vivo X200 Ultra នឹងជាទូរស័ព្ទដំបូងនៅក្នុងត្រកូល X200 ដែលប្រើ Snapdragon 8 Elite ខណៈដែល X200 និង X200 Pro ប្រើ Dimensity 9400។ ចំណែកឯ X200S ត្រូវបានរំពឹងថានឹងប្រើ Dimensity 9400 Plus។ លើសពីនេះ ព្រឹត្តិការណ៍ខែមេសា អាចមានការប្រកាសអំពី Vivo X200 Pro Mini ជាមួយពណ៌ស្វាយថ្មីផងដែរ។
ប្រភព : gizmochina