កាលពីពេលថ្មីៗនេះ ក្រុមហ៊ុនផលិតទូរស័ព្ទដៃ TECNO បានប្រកាសដាក់បង្ហាញចេញលក់ជាផ្លូវការនូវទូរស័ព្ទដៃសេរ៊ីថ្មី TECNO PHANTOM V Flip2 5G ដែលជាទូរស័ព្ទដៃអាចបត់បានជំនាន់ទី២ ជាមួយតម្លៃលក់ចាប់ពី ៦៩៩ ដុល្លារ ក្នុងទីផ្សារសកល។
ទូរស័ព្ទដៃ TECNO PHANTOM V Flip2 5G ទទួលបានអេក្រង់ខាងក្រៅទំហំ ៣,៦៤ អ៊ីញ ប្រភេទ AMOLED 120Hz មានកម្រិតបង្ហាញ 1056 x 1066 pixels និងអេក្រង់ខាងក្នុងទំហំ ៦,៩ អ៊ីញ ប្រភេទ AMOLED 120Hz LTPO មានកម្រិតបង្ហាញ FHD+ 1080 x 2640 pixels ដំណើរការដោយបន្ទះឈីប MediaTek Dimensity D8020 និងប្រព័ន្ធប្រតិបត្តិការ Android 14 នៅលើ HiOS ព្រមទាំងទទួលបាន RAM 8GB និងអង្គផ្ទុក 256GB។
សម្រាប់កាមេរ៉ាគោលខាងក្រោយរបស់ទូរស័ព្ទដៃ TECNO PHANTOM V Flip2 5G មានទំហំ 50MP និងលេន Ultra-Wide ទំហំ 50MP ខណៈកាមេរ៉ាមុខមានទំហំ 32MP ជាប្រភេទលេនទម្លុះអេក្រង់។ ចំណែកផ្នែកថាមពលវិញ វាទទួលបានថាមពលថ្ម 4,720mAh គាំទ្រការសាកថ្ម 70W តាមខ្សែ ដែលអាចសាកបានមួយពេញចំណាយពេលខ្ទង់ ៤៣នាទី។ លើសពីនេះទៅទៀត ទូរស័ព្ទដៃ TECNO PHANTOM V Flip2 5G មានភ្ជាប់មកជាមួយមុខងារការពារជម្រាបទឹក និងធូលី ព្រមទាំងគាំទ្រការតភ្ជាប់ 5G, Wi-Fi 6 និង Bluetooth v5.3។ ក្នុងនោះទូរស័ព្ទដៃ TECNO PHANTOM V Flip2 5G គាំទ្រមុខងារ AI រួមមានមុខងារ Ella Smart AI Assistant, AI Smart Erase និង AI Drawing Board។
ចំពោះការរចនារបស់ទូរស័ព្ទដៃ TECNO PHANTOM V Flip2 5G មានសភាពស្តើងដែលមានកម្រាស់ត្រឹមតែ ៧,៦៤ មីលីម៉ែត្រ ពេលលាតអេក្រង់ និង ១៦ មីលីម៉ែត្រ ពេលបត់អេក្រង់ រួមជាមួយទម្ងន់ត្រឹមតែ ១៩៦ ក្រាម ប៉ុណ្ណោះ និងទទួលបាននូវជម្រើសពណ៌ចំនួន២ រួមមានពណ៌ Travertine Green និង Moondust Grey៕
ប្រភពៈ FoneArena